لقّبه رفقاؤه في سيناء بأسد الصاعقة، فكان من أوائل شهدائها
بين الحلم والحقيقة فاصل دقيق جدًا، وربما كان هذا الفاصل هو ذاته الحد الواصل بينهما. أدركت هذا الوصل تمامًا عندما رأيت بطل أحلامي وفارسها الذي زارني كثيرًا قبل أن ألتقيه في الحقيقة. كنا نتحدث لا لنتعارف، بل لنتشارك الفكرة. كان إذا انتوى المجيء من سيناء إلى القاهرة شممت رائحته، وفورًا استشعرت أنامله تداعب خصلاتي، فإذا دق على باب بيتي طرب القلب لدقاته، وترقص أشياء بداخلي، وسألته – كما اعتدنا –: من؟ أجاب: «أنتِ»، فكانت «الأنا» حائرة بيني وبينه، وكنا على يقين من أننا روح واحدة كانت في السابق البعيد، وأتت لتجمع بين جسدين.
شاركته وقاسمني كل شيء، الحياة بحلمها وواقعها، وأيامها وآمالها، وشروقها وغروبها، حتى إننا اتفقنا على أسماء أولادنا، وخطوات أقدامنا، وعدد أنفاسنا… هنا في الحلم عندما تقابلنا فيه، لكن شيئًا كان يتسلل بيننا خفية، يعلمه هو، ويطلبه همسًا، وأتجاهله أنا ولا أنكره. كنت أنشغل عن هذا الشيء الملح بزهرتينا اليانعتين، فكان حبيبي يترك لي مهمة تربيتهما ورعايتهما، ويروح ويجيء في الحلم والحقيقة، وفي كل مرة تناديني عيناه برجاء وتوسل بدعاء خفي، أراه من بعيد قادمًا إلينا، وأشيح بناظري عنه علّه يفلتنا ويتخطانا.
وما زلت أتهرب من هذا الرجاء الذي يملأ عيني حبيبي، وهو لا يزال يتمسك بأمله المنشود، وما بين الحلم واليقظة يكرر هو عليّ الرغبة في أن يحقق الله له الرجاء، فلا قوة لي تعاند القدر، ولا يحول عن بلوغه الأمل حدٌّ، فذهب جسده بعيدًا إلى هناك، واصطحب نصف روح كانت لي! وبقي جسد كان لي هنا في صحبة حبيبي، هو الروح وكل الحياة.
تحكي زوجة الشهيد البطل المقدم مصطفى محمد نجيب الخياط، المكنى بـ«أسد الصاعقة»: «كان منذ عرفته عطوفًا رقيقًا، يخفي قوته وصلابة جأشه، ويظهر الرأفة على كل من حوله. يتحدث عن مصر كثيرًا، وعن سيناء أكثر، حتى في صلاته كنت أسمعه يتمتم بالدعاء لهما، ويخص نفسه بدعاء الشهادة من أجلهما. كنت أخفي غيرتي من حبه الأكبر، ولأنه كان متيمًا بوطنه جعلته هو وطني حتى يستريح قلبي، ومرت الأيام وتأقلمت على أن تشاركني سيناء في حبيبي، وبلغ الحد مداه عندما رأيته يربي ولدينا «مؤمن» و«مالك» على حب سيناء، وما كان مني إلا أنني آمنت بها معه، وشرعت في غرس الفروسية والبطولة في أحلام وآمال مؤمن ومالك، ورضيت بأن أكون زوجة لبطل وأمًا لمشروعَي بطلين يكمّلان المسيرة.
كنا عندما نخرج إلى نزهة أراه يعقد المقارنة لهما بين مصر وغيرها من بلدان العالم، فيعدد من صور الجمال المتفرد لمصر على غيرها، حتى إن مؤمن في مرة سارع بالاتصال بوالده، وهو في مهمة تدريب بالولايات المتحدة، ليسأله: «هل أمطار أمريكا أجمل أم الأمطار في مصر؟» ويرد مصطفى على مؤمن بالصورة التي يرسلها له عن أعاصير منتشرة بالولايات المتحدة، ويقول له: هنا الأمطار مدمرة وقاتلة، أما في مصر فالأمطار تهب لنا النماء والحياة. إلى أبعد من هذا كان حب مصطفى لمصر، وكانت رغبته في زرع هذا الحب في قلب مؤمن ومالك وتوريثه لهما، حتى إنه كان يعلن لهما صراحة أن حلمه الكبير أن ينال الشهادة من أجل مصر.
ومع تكرار مقولته تلك لأولاده، اعتاد الأولاد على معنى الشهادة، وكان اليوم المشهود في 16/4/2018م، يوم الاثنين، اليوم اللي جالنا فيه الخبر. أردت أن أبلغ الأولاد بنفسي، ومجرد إني وقفت أمامهم وسألت أولادي: إيه أكتر حاجة بابا كان مستنيها؟ قالولي: إنه يطلع عند ربنا. قلت لهم: بابا أمنيته اتحققت وراح عند ربنا، لأننا لما كنا بنخرج أنا وهو والأولاد كان بيطلع من شباك العربية ويدعي: «يا رب أنال الشهادة وأنا واقف على رجلي وأرجع لأهلي سليم ومتعبش». وكنت دايمًا أقوله: ليه بتدعي كده؟ كان يقول لي: دي أعظم أمنية. وسألتهم لما جابولي الخبر: هو اتوجع؟ قالولي: لأ، وكان واقف على رجله. قلت لهم: جه سليم؟ قالولي: آه. وقلت لهم: طب الحمد لله، ربنا تقبل دعوة مصطفى كاملة متكاملة زي ما كان بيقولها».
عرفت بعدها تفاصيل استشهاد البطل، وهي أنه كان صائمًا كما اعتاد كل يومي الاثنين والخميس، وعندما حاول زملاؤه إثنائه عن الصيام والإفطار لأنهم ذاهبون إلى مطاردة الإرهابيين، وقد يطول الأمر لساعات ويحتاج إلى مشقة، إلا أنه رفض وأتم صيامه، وكان يردد أمامهم: «اللهم ارزقنا النصر أو الشهادة»، ونال ما تمنى إثر انفجار عبوة ناسفة أودت بحياته، وهو صائم، أثناء مداهمة أحد أوكار الإرهابيين داخل سيناء، حفاظًا على الأرض والعرض وأمن الوطن.
«كان بقالنا 3 أيام متكلمناش، وقبل استشهاده بيوم، زي ما كان متعود من أربع سنين، كان بيصوم الاثنين والخميس، وفي يوم المداهمة كان صايم، وزمايله قالوله: ليه صايم؟ إحنا عندنا مداهمة. قالهم: أنا النهارده الاتنين ومتعود أصومه، خلاص أنا طالع، يلا بينا. واستشهد بعبوة ناسفة. فلما جه علشان يقولولي، أول ما شوفتهم عرفت، ومحدش قال لي حاجة، روحت بصيت لهم وقلت لهم: إنا لله وإنا إليه راجعون. وأنا كان بقالي 7 أيام بحلم بنفس الحلم، إنهم جايين بيخبطوا عليّ الباب وبيقولولي: مصطفى خلاص استشهد. بس الحمد لله أنا معملتش أي حاجة تزعله، كان يومه جميل، ووصّى محدش يطلع في جنازته من السيدات أو يصوّت، ويخلي يومه خفيف. كان موصيني على كل حاجة، لغاية العلم هيتحط إزاي، هينزل فين، هيتصلى عليه في أنهي جامع، كان حاكيلي كل حاجة عن يومه، وكل اللي حكاه حصل».
وتعود الزوجة بالحكي من البداية: «الشهيد هو بطل مصر في السباحة بالزعانف، وممثل منتخب مصر في العديد من المحافل العربية والدولية، وكان عضوًا بالاتحاد المصري للغوص والإنقاذ».
وتحكي أن مؤمن، ابنه الأكبر، تذكر في أول عيد ميلاد له بعد استشهاد والده: «كان نفسي تكون واقف جنبي النهارده في عيد ميلادي، وحاجة واحدة حرماني منك، بس اللي مصبرني عليها إنك في الجنة، وإنك سيبت سيرة وتاريخ يشرفني طول حياتي. بابا، أحب أقولك إني فخور بيك، وأوعدك أبقى زيك، أسد ما يخافش، وهكمل المشوار مكانك. مصر في عنيا، متقلقش، واللي يقرب لها هشيله من على وش الأرض، وأوعدك لو الوطن طلب روحي مش هتردد لحظة. مش هنساك أبدًا، ولا صورتك هتروح من عيني لحظة».
وتكمل الحكي الدكتورة رضوى، زوجة الشهيد البطل: «دائمًا ما كنا نصحى من النوم يوم عيد ميلاد مؤمن، فكان ليه عادة كده، كان لازم ياخد مؤمن الصبح ويخرجوا هما الاتنين ويطلع حاجة لله، وكان بيقول لابنه: لازم تطلع حاجة لله يوم عيد ميلادك، لأني أنا طلعت حاجة يوم عيد ميلادك. وولاده واخدين منه كل حاجة: شخصيته وحركاته وجسمه وضحكته، ومالك الصغير واخد منه عصبيته وحركاته وهزاره.
وعيد ميلاد مؤمن اللي محضروش والده، جه اتصال منه وقال: يا مؤمن، متجيبش التورتة إلا لما آجي، عشان هعملك عيد ميلاد كبير، وياريت متعملش عيد ميلادك من غيري. لكن أراد الله أن مصطفى يجيلنا بعد 4 أيام، زي ما قال، بس جه ملفوف بعلم مصر. مصر كلها احتفت بوالد مؤمن واحتفلت بعيد ميلاد مؤمن».
«أول مرة رحت زرته في القبر حسيت بحاجة جميلة جدًا، ما قدرتش أحكيها ساعتها لأي حد، ولما جيت أمشي من عنده شميت رائحة حلوة، وحسيت وكأنه بيطبطب عليّ. وأول مرة برضه أرجع فيها البيت بعد استشهاده شميت ريحته، وحسيته موجود في الشقة، بس إحنا اللي مش عارفين نشوفه.
وفي مرة مؤمن كان عنده بطولة، ولاقيته بيقول لي: أنا خايف يا ماما. قلت له: من إيه؟ قال لي: أول مرة أحضر بطولة من غير بابا. قلت له: طب تعالى نروح ونشوف هيحصل إيه، بس أنت اعمل كل اللي عليك في البطولة دي، عشان هو هيشوفك وهيفرح بيك. فلقيت مؤمن بيقول لي بعدها: ماما، وأنا واقف على الاستارت قبل ما أنط في حمام السباحة، بابا كان واقف جنبي. قلت له: إزاي يا مؤمن؟ قال لي: مش عارف، بس حسيته واقف جنبي. قلت له: بابا مش ممكن هيسيبك».
وترجع البطلة، زوجة الشهيد، بحكيها إلى ما قبل استشهاد فارسها بأيام، يوم استشهاد صاحبه أحمد فوزي، وكان قبل استشهاده بـ40 يومًا، اتصل بيا وقال لي: «أنا اللي عليّ الدور، وأنا شاممها، ورايح مش هلمّ حاجة حد تاني من زمايلي، بس أوعديني أما أروح محدش يزعل من أهلي، وأنا هبقى استريحت، وأنا هبقى ضحيت عشان حاجة كبيرة أوي، وأنا كده كده رايح، بس هروح عشان مصر».
«وآخر مرة شوفته فيها في بيتنا قبل ما يمشي، كنت بعيط. أول ما دخلت البيت لقيته بيقول لي: بتعيطي ليه؟ قلت له: مش عارفة، خايفة عليك. قال لي: متقلقيش، هترتاحي. قلت له: أنت بتقول كده ليه؟ قال لي: ولا حاجة، بس متخافيش طول ما أنا موجود معاكي، لكن لما أروح مش عارف. قلت له: متقولش الكلام ده.
وبعد الكلام ده اللي حصل بيني وبينه، هو راح ومجاش. وهو ماشي في اليوم ده، آخر يوم شوفته فيه، قلت له: لا إله إلا الله. إداني ضهره لأول مرة وقال لي: محمد رسول الله. قلت له: أنت مش باصص ليه؟ قال لي: كفاية كده. مكنتش فاهمة ساعتها، ومكنتش مستوعبة اللي بيقوله، طلع هو كان حاسس وعارف».
الشهيد مصطفى الخياط
الشهيد مصطفى الخياط
الشهيد مصطفى الخياط
الشهيد مصطفى الخياط
الشهيد مصطفى الخياط وابنه
الشهيد مصطفى الخياط
